Euroguidance styrkti þátttöku íslenskra ráðgjafa á evrópskri ráðstefnu í Riga

7.1.2026

Dagana 2.–3. desember sóttu Kristín Birna Jónasdóttir, náms- og starfsráðgjafi við Borgarholtsskóla, og Margrét Rósa Haraldsdóttir, náms- og starfsráðgjafi við Víkurskóla, Euroguidance European Conference í Riga í Lettlandi. Euroguidance á Íslandi styrkti þátttöku þeirra í ferðinni, sem er liður í því að efla faglegt starf, evrópska vídd náms- og starfsráðgjafar og tengslanet íslenskra ráðgjafa.

State Education Development Agency VIAA.

Ráðstefnan var haldin undir yfirskriftinni Sustaining guidance within the Union of Skills og fór fram bæði á staðnum og í streymi. Um 150 þátttakendur frá 25 evrópulöndum tóku þátt.

Euroguidance er evrópskt samstarfsnet sem hefur það hlutverk að styðja við gæði náms- og starfsráðgjafar, efla samstarf milli landa og stuðla að upplýsingamiðlun og faglegri þróun, meðal annars með því að styrkja þátttöku ráðgjafa í alþjóðlegum viðburðum.

Ævilöng náms- og starfsráðgjöf í brennidepli

Fyrri dagur ráðstefnunnar hófst með erindum um nýjustu rannsóknir á sviði náms- og starfsráðgjafar í Evrópu. Þar var lögð rík áhersla á mikilvægi ævilangrar ráðgjafar og að einstaklingar hafi aðgang að fagfólki þegar teknar eru ákvarðanir um nám og störf.

„Það kom mjög skýrt fram hversu mikilvæg ævilöng náms- og starfsráðgjöf er, sérstaklega í ljósi hraðra breytinga á vinnumarkaði,“ segir Kristín Birna.

Meðal fyrirlesara var Dr. Jaana Kettunen, forseti International Association for Educational and Vocational Guidance (IAEVG), sem fjallaði um stefnumótandi hlutverk ráðgjafar innan Evrópu.

Græn ráðgjöf og framtíðarhæfni

Seinni dag ráðstefnunnar fóru fram pallborðsumræður um stöðu fagsins í Evrópu og hvernig tryggja megi jafnan aðgang að náms- og starfsráðgjöf. Þá hélt Tomáš Šprlák, stjórnarmaður í Lab Green Guidance, erindi um umhverfisvæna ráðgjöf (e. green guidance) og hlutverk ráðgjafa í tengslum við sjálfbærni og græna umbreytingu.

„Umhverfis- og sjálfbærnimál eru orðin órjúfanlegur hluti af umræðunni um framtíð náms og starfa,“ segir Margrét Rósa.

Tengslamyndun og reynslumiðlun

Auk fyrirlestra og vinnustofa gaf ráðstefnan gott svigrúm til óformlegra samskipta, meðal annars með gönguleiðsögn um gamla bæinn í Riga og sameiginlegum kvöldverði.

„Það var afar dýrmætt að hitta aðra náms- og starfsráðgjafa og efla tengslanetið. Við komum heim með nýjar hugmyndir og tengingar við kollega frá Finnlandi, Noregi, Svíþjóð og Rúmeníu,“ segja þær.