Níu nýir eTwinning skólar

17.3.2020

Til hamingju Brekkubæjarskóli, Grunnskóli Bolungarvíkur, Hamraskóli, Heilsuleikskólinn Skógarás, Leikskólinn Furugrund, Leikskólinn Holt, Norðlingaskóli, Selásskóli og Setbergsskóli. Grunnskóli Bolungarvíkur og Leikskólinn Holt fengu viðurkenninguna þegar hún var veitt fyrst árið 2018 og hljóta hana því nú í annað sinn. Í fyrra hlutu Hrafnagilsskóli og Verzlunarskóli Íslands sömu viðurkenningu.

Titillinn ‚eTwinning skóli‘ er viðurkenning á öflugu og góðu evrópsku samstarfi í gegnum þátttöku í eTwinning verkefnum. Viðurkenningin er þó ekki síður liður í skólaþróun því eTwinning skólar eflast enn frekar í notkun upplýsingatækni og alþjóðasamstarfi og hafa tækifæri til styrkja starfsþróun kennara og skólastjórnenda og auka alþjóðatengsl skólans:

• eTwinning skólar eru sýnilegri í skólasamfélagi eTwinning

• Skólarnir fá tækifæri til að mynda tengsl við aðra eTwinning skóla í Evrópu og verða hluti af evrópsku neti eTwinning skóla

• Þeir hafa aðgang að námskeiðum og vinnustofum sem eykur þannig möguleika og tækifæri til starfsþróunar fyrir kennara og skólastjórnendur.

Skilyrðin sem skólar þurfa að uppfylla til að geta sótt um titilinn eru eftirfarandi:

1. Skólinn hefur verið skráður í eTwinning í að lágmarki tvö ár
2. Í skólanum starfa að lágmarki tveir kennarar sem eru virkir í eTwinning
3. Að lágmarki einn kennari við skólann hefur tekið þátt í verkefni sem hlaut gæðamerki (National Quality Label) á síðustu tveimur árum