Íslenskir háskólar í evrópskum háskólanetum (e. European Universities alliances) hafa í samstarfi við Landskrifstofu Erasmus+ stofnað samstarfsvettvang með stuðningi frá Menningar-, nýsköpunar- og háskólaráðuneytinu.
Markmið samstarfsvettvangsins er að kynna háskólanetin og veita upplýsingar um þau. Einnig er markmiðið að fjalla um sameiginleg tækifæri og áskoranir háskóla í evrópskum háskólanetum og stuðla að virku samtali við stjórnvöld um hvernig íslenskt lagaumhverfi geti stutt við markmið netanna og tryggt þátttöku Íslands í mótun evrópska háskólasvæðisins. Íslenskir háskólar sem eru ekki í evrópskum háskólanetum eiga áheyrnafulltrúa á fundum samstarfsvettvangsins.
Í myndbandinu hér að neðan er fjallað um hvernig háskólanetin skapa tækifæri til djúps alþjóðlegs samstarfs, þróunar náms og kennslu og samfélagslegrar nýsköpunar og styðja þannig við samkeppnishæfni íslenskra háskóla.
Aurora er net níu rannsóknaháskóla með samfélagsleg áhrif kennslu og vísinda að leiðarljósi. Markmiðið er að samþætta samfélagslega nýsköpun og sjálfbærni inn í nám, kennslu og rannsóknir á áhrifaríkan hátt og gera nemendum kleift að öðlast þekkingu og færni til að takast á við helstu samfélagslegu áskoranir samtímans. Háskólarnir í Aurora þróa sameiginleg námskeið og námsleiðir, svo sem örnám, tengd einhverjum af eftirfarandi fimm áherslusviðum: Sjálfbærni og loftslagsbreytingar; heilsa og velferð; stafrænt samfélag og alþjóðleg borgaravitund; menning: fjölbreytni og sjálfsmyndir; samfélagsleg nýsköpun og frumkvöðlafræði. Háskóli Íslands leiðir Aurora. Nánari upplýsingar og fréttir á vef HÍ.
NeurotechEU er net átta háskóla sem einbeitir sér að menntun og rannsóknum í taugavísindum og tækni og mun móta næstu kynslóð þverfaglegra vísindamanna og frumkvöðla sem munu takast á við ýmsar áskoranir tengdar tækni og heilsu. NeurotechEU ýtir undir tæknilega og samfélagslega nýsköpun þar sem áhersla er lögð á þverfagleika og hreyfanleika í vísindastarfi og kennslu. Nánari upplýsingar og fréttir á vef HR.
UNIgreen er net átta landbúnaðar og lífvísindaháskóla sem er ætlað að efla samvinnu um menntun, rannsóknir, nýsköpun og miðlun þekkingar á sviði landbúnaðar, lífvísinda og líftækni. UNIgreen stefnir að því að vera leiðandi í háskólamenntun á sviði sjálfbærs landbúnaðar, grænnar líftækni og umhverfis- og lífvísinda. Ýtt er undir að nemendur og allt fræðasamfélagið þrói gildi, viðhorf, þekkingu, færni og hæfni til að verða fulltrúar fyrir umskipti í átt að loftslagshlutlausu og auðlindahagkvæmu hagkerfi.
Háskólinn á Bifröst er þátttakandi í háskólanetinu OpenEU sem bætist þann 1. desember 2024 í hóp evrópskra háskólaneta. OpenEU er fyrsti samevrópski opni háskólinn sem tíu fjarnáms háskólar taka þátt í. Netið leggur áherslu á stafræna þróun og nýsköpun í háskólanámi með það að markmiði að gera háskólana opna, aðgengilega og sveigjanlega til að mæta þörfum ólíkra einstaklinga og stuðla að ævinámi. Til viðbótar við þróun fjarnáms og örnáms leggur netið áherslu á sjálfbærni, inngildingu og evrópsk gildi.
Samstarfvettvangurinn leiddi saman fulltrúa stjórnvalda, háskóla, nemenda og annarra hagsmunaaðila á málþingið „Eru evrópskir háskólar í farabroddi? - ávinningur og áskoranir af þátttöku íslenskra háskóla í evrópskum háskólanetum“ til að ræða stöðu mála hérlendis og framtíð háskóla í Evrópu. Hægt er horfa á upptöku af málþinginu hér að neðan.
