European Solidarity Corps

Sjálfboðaliða- og samfélagsverkefni

European Solidarity Corps áætlunin er Evrópuáætlun fyrir ungt fólk sem vill sýna samstöðu á fjölbreyttum vettvangi.  Þetta er allt frá því að hjálpa þeim sem standa höllum fæti yfir í mannúðaraðstoð auk þess að leggja sitt af mörkum til heilbrigðis- og umhverfismála í Evrópu og víðar.  Áætlunin mun skapa tækifæri fyrir að minnsta kosti 270.000 ungmenni í Evrópu.  Unga fólkið getur tekist á við samfélagslegar áskoranir með sjálfboðaliðastörfum og Samfélagsverkefnum.  Áætlunin leggur áherslu á inngildingu ásamt því að hvetja til grænni ferðamáta og auka stafræna færni ungs fólks. 

Hverjir geta sótt um?

Ungt fólk á aldrinum 18-30 ára. Sjálfboðaliðaverkefni geta verið annars vegar í Evrópu og hins vegar innanlands. Samtök og sveitarfélög geta sótt um að taka á móti eða senda einstaklinga í 2-12 mánuði, einnig er hægt að senda eða taka á móti einstaklingum sem þurfa meiri stuðning í 2 vikur til 2 mánuði.  Hópar geta einnig tekið þátt í 2 vikur til 2 mánuði og þá sem 5-40 manns saman.

Hvernig er sótt um?

Sótt er um í gegnum rafrænt umsóknarkerfi European Solidarity Corps.  Tveir umsóknarfrestir eru á hverju ári; yfirleitt í febrúar og október.  Fyrri fresturinn er þó í maí árið 2021.  Samtök þurfa að hafa Gæðavottun til að geta sótt um en ungt fólk á aldrinum 18-30 ára getur sótt sjálf um að gerast sjálfboðaliðar á vef Evrópsku Ungmennagáttarinnar.

  • Fyrir samtök/stofnanir/sveitarfélög
  • Fyrir ungt fólk á aldrinum 18-30 ára

Hvaða styrki er hægt að sækja um?

European Solidarity Corps veitir styrki í tveimur verkefnaflokkum:

Sjálfboðaliðaverkefni

Sjálfboðaliðaverkefnin geta verið annars vegar í Evrópu og hins vegar innanlands. Samtök og sveitarfélög geta sótt um að taka á móti eða senda sjálfboðaliða.

Samfélagsverkefni

Samfélagsverkefni eru frumkvæðisverkefni sem hafa það að markmiði að bæta nærsamfélagið. Þetta eru fjölbreytt verkefni sem tengjast meðal annars því að aðstoða fólk við að aðlagast samfélaginu, auka lýðræðislega þátttöku, efla umhverfis- og náttúruvernd og fleira.

Hver er ávinningurinn af sjálfboðaliðastörfum?

Fyrir ungt fólk: Auka samfélagslega og borgaralega þátttöku ungs fólks, víkka sjóndeildarhringinn, efla sjálfstraust, auka tungumálakunnáttu, efla persónulega og faglega þróun auk þess að hitta nýtt fólk og eignast nýja vini.

Fyrir samtök: Tækifæri til að vinna með ungu fólki, skiptast á góðum starfsháttum, auka skilning á félagslegum og menningarlegum fjölbreytileika, skapa virkara faglegt umhverfi.

Fyrir samfélög: Aukin geta til að takast á við samfélagsbreytingar, móttækilegri gagnvart fjölbreytni og félagsleg aðlögun í reynd.








Þetta vefsvæði byggir á Eplica