Viðurkenning á erlendu starfsnámi

Umsækjendur um mat og viðurkenningu á erlendri iðnmenntun snúi sér til Rafmenntar ef um rafiðngrein er að ræða, en til Iðunnar-fræðsluseturs fyrir aðrar iðngreinar (sjá heimilisföng og veftengla í umsóknareyðublaði).

Umsókn

Við undirbúning að umsókn um viðurkenningu skulu eftirfarandi gögn lögð fram:

• afrit af lokaprófskírteini á upprunalegu tungumáli, sem stimplað er af þeim skóla sem veitti það, eða öðrum viðurkenndum aðila
• þýðing á prófskírteininu yfir á íslensku eða ensku
• staðfestar upplýsingar um reynslu umsækjanda af starfi í þeirri starfgrein sem hann hyggst stunda á íslensku eða ensku
  
• staðfesting á réttindum viðkomandi í heimalandinu á íslensku eða ensku,
  þegar svo ber undir
• ljósrit af vegabréfi

Brýnt er að ljósrita allt prófskírteinið þannig að fram komi inntak námsins (upptalning námsgreina) og umfang þess í árum.

Þeir fræðsluaðilar sem fara yfir umsóknina senda hana að yfirferð lokinni með umsögn til Menntamálastofnunar.

Umsókn um leyfisbréf til starfa í heilbrigðisþjónustu er send Landlæknisembættinu.

Viðurkenning

Teljist aðili uppfylla skilyrði um menntun til starfa í löggiltri iðngrein hér á landi, fær hann umsögn þar að lútandi frá Menntamálastofnun. Ekki er þá gerð krafa um frekara nám til þess að starfa hérlendis á umræddu sviði, hins vegar þarf viðkomandi að afla sér atvinnuleyfis hjá Vinnumálastofnun ef hann kemur frá landi utan EES-svæðisins. Sýslumaðurinn á Austurlandi gefur út leyfisbréf til handa þeim einstaklingum sem uppfylla skilyrði um menntun og starfsreynslu til starfa hér á landi.