Inngilding (e. inclusion) felur í sér að fólki sem annars væri útilokað eða jaðarsett séu veitt jöfn tækifæri og úrræði til virkrar þátttöku í samfélaginu.
Ólíkir þættir líkt og kyn, kynhneigð, trú, uppruni, kynþáttur, fötlun, efnahagsleg staða, líkamleg og andleg geta, geta haft margþætt áhrif á einstaklinga og komið í veg fyrir að þau upplifi jöfn tækifæri í samfélaginu. Án inngildingar fá ekki öll tækifæri á þeirri upplifun sem þátttaka í verkefnum Erasmus+ og European Solidarity Corps veitir. Þessir hópar einstaklinga eru af einhverjum ástæðum, einni eða fleiri, ólíklegri til að sækja um styrk eða eiga erfiðara um vik að taka þátt í verkefnum sem ekki eru skipulögð með þarfir þeirra í huga.
Markmið Landskrifstofu Erasmus+ á Íslandi er að opna huga fólks og auka víðsýni þess. Hlutverk stefnunnar er að hvetja starfsfólk Landskrifstofu, umsækjendur og styrkþega til að sjá mikilvægi inngildingar og fjölbreytileika í lífi og starfi. Með því að temja sér inngildandi hugarfar og taka virkan þátt í inngildingu er það ósk Landskrifstofu að inngilding verði að eðlilegum og hverdagslegum hluta í lífi og hugarfari fólks í íslensku samfélagi.
Inngildingarstefna Landskrifstofu Erasmsus+ (pdf)
Inngilding (e. inclusion) er lykilþáttur í stefnu Erasmus+ og European Solidarity Corps sem Landskrifstofan vinnur eftir. Markmið Landskrifstofu er að stuðla að því að unnið sé eftir sömu gildum í verkefnum sem áætlunin styrkir á Íslandi og í samvinnu við íslenska aðila. Landskrifstofa Erasmus+ starfar innan Rannsóknamiðstöðvar Íslands sem er opinber stofnun. Í því hlutverki telur Landskrifstofan mikilvægt að sýna samfélagslega ábyrgð og stuðla að því að tækifærin sem Erasmus+ og European Solidarity Corps bjóða upp á séu opin og aðgengileg öllum. Í Evrópustefnunni er taldir upp níu ólíkir þættir sem ná yfir ástæður sem geta réttlætt aukinn stuðning við þátttakendur. Ýtarlegri lýsingu á þessum þáttum má finna á vef Landskrifstofunnar, en þættirnir eru fötlun, veikindi, hindranir tengdar menntakerfinu, menningarmunur, félagslegar hindranir, efnahagslegar hindranir, hindranir vegna mismununar og landfræðilegar hindranir.
Skortur á sýnileika fólks úr viðkvæmum hópum í íslensku samfélagi gerir það að verkum að einstaklingar sem tilheyra hópnum átta sig oft ekki á þeim tækifærum sem þeim stendur til boða í gegnum áætlanirnar, eða gera ekki tilkall til þeirra vegna þess að þau telja tækifærin ekki eiga við um þau sjálf. Á sama tíma geta verkefnisstjórar verið ómeðvitaðir um hvaða þættir í skipulagningu verkefna geta verið útilokandi fyrir einstaklinga úr ákveðnum hópum eða stuðla ekki að fullri þátttöku þeirra.
Á Íslandi er engin alhliða stefna um inngildingu en lög um jafna meðferð á vinnumarkaði óháð kynþætti, þjóðernisuppruna, trú, lífsskoðun, fötlun, skertri starfsgetu, aldri, kynhneigð, kynvitund, kyneinkennum eða kyntjáningu tóku gildi 1. september 2018. Með þessi lög að leiðarljósi, ásamt lögum um jafna stöðu kynjanna, telur Landskrifstofan mikilvægt að inngilding sé fléttuð inn í starf skrifstofunnar og verkefni á vegum áætlunarinnar á virkari hátt.
Við gerð inngildingarstefnunnar kortlagði landskrifstofan sérstaka áhersluhópa fyrir tímabilið 2021-2027. Samkvæmt kortlagningu Landskrifstofunnar árið 2021 var eftirfarandi listi tekinn saman sem sérstakir áhersluþættir er viðkemur inngildingu. Kortlagningin fól í sér yfirferð á tölfræði um þátttakendur auk reynslu starfsfólks landskrifstofunnar af samtölum við styrkþega og vitneskju um stofnanir, samtök og einstaklinga sem síður taka þátt í áætlununum.
Á Íslandi er algengara en gengur og gerist sunnar í Evrópu að fólk stundi nám eftir að það eignast börn, eða að einstæðir foreldrar stundi nám. Mikilvægt er að þessi hópur fái sömu tækifæri og aðrir nemendur til að taka þátt í áætluninni. Vegna framfærslukostnaðar geta þessir einstaklingar upplifað að dvöl erlendis sé ekki á færi þeirra. Til þess að tryggja að þessi hópur taki þátt er mikilvægt að koma upplýsingunum á framfæri um þá styrki og þátttökumöguleika sem standa hópnum til boða en í háskólahluta er nú til að mynda hægt að fá viðbótarstyrk fyrir fólk með börn á framfæri.
Fjöldi fólks af erlendum uppruna hefur aldrei verið meiri á Íslandi en í dag eru u.þ.b. 22% þeirra sem hér búa innflytjendur, önnur kynslóð innflytjenda og fólk með eitt erlent foreldri2. Rannsóknir benda til að fólk af erlendum uppruna hafi ekki sömu tækifæri á vinnumarkaði á Íslandi, jafnvel þegar menntunarstig þeirra er hátt, og að upplýsingamiðlun til hópsins sé almennt ábótavant. Ungt fólk með innflytjendabakgrunn er einnig síður líklegt til að taka þátt í æskulýðs- og íþróttastarfi. Til þess að tryggja inngildingu þeirra í verkefnum áætlunarinnar er mikilvægt að styrktækifærum sé komið á framfæri við þau, upplýsingar séu aðgengilegar á fleiri tungumálum en á íslensku og að kynningarefni endurspegli fjölbreyttan markhóp. Auk þess er mikilvægt að verkefnisstjórar séu meðvitaðir um fjölbreytileika þátttakenda og að þörfum fólks með ólíkan bakgrunn sé mætt í verkefnum til að tryggja virka þátttöku þeirra.
Nýlegar rannsóknir á Íslandi sýna fram á erfiða stöðu fólks sem fellur undir NEET hópinn (e. not in education, employment or training). Í þessum hópi er nokkuð hátt hlutfall ungra einstæðra foreldra, ungra karla og ungs fólks með erlendan bakgrunn, þá sérstaklega ungra kvenna með innflytjendabakgrunn. Það er mat Landskrifstofunnar að erfitt hafi reynst að ná til þessa hóps hingað til en að þátttaka hans í verkefnum áætlunarinnar gæti stuðlað að aukinni virkni hans í samfélaginu. Markmið Landskrifstofu er að gæta þess sérstaklega að upplýsingar nái til þessa hóps.
Inngildingarstefnur hafa lengi miðað að því að auka tækifæri fatlaðs fólks og þótt áhersla hafi nú þegar verið lögð á að virkja samtök fatlaðra í Erasmus+ áætluninni má gera mun betur. Í ljósi þeirrar vitundarvakningar sem hefur átt sér stað um andlega heilsu telur Landskrifstofa nauðsynlegt að vekja sérstaka athygli á þeim stuðningi sem áætlunin býður upp á vegna andlegra veikinda. Nýlegar rannsóknir á Íslandi sýna fram á erfiða stöðu fólks með fatlanir, en úr þeim hópi eiga tæplega átta af hverjum tíu erfitt eða frekar erfitt með að ná endum saman. Sömuleiðis standa einstæðir foreldrar með fötlun og einhleypt fatlað fólk höllum fæti fjárhagslega. Mörg þeirra finna fyrir félagslegri einangrun og meirihluti finnur fyrir fordómum.5 Markmið Landskrifstofu er að auka upplýsingagjöf til þessa fólks og styðja betur við þau sem hafa áhuga á að taka þátt í áætluninni.
Landfræðileg staðsetning
Vegna landfræðilegrar legu eiga Íslendingar almennt erfiðara um vik að ferðast milli landa en þátttakendur frá öðrum löndum Evrópu. Í mörgum tilvikum eru engin bein flug í boði og því verður oft að millilenda eða taka lest seinni hluta leiðarinnar. Þetta gerir það að verkum að ferðatími til og frá Íslandi er oft langur.
Auk þessa eru vegalengdir innanlands og fjarlægðir milli þéttbýliskjarna yfirleitt miklar, almenningssamgöngur af skornum skammti og margir vegir varasamir um vetur. Þótt stundum sé boðið upp á millilandaflug frá Akureyri og Egilsstöðum fer flest alþjóðleg flugumferð um Keflavíkurflugvöll. Þar sem innanlandsflug fer um flugvöllinn í Reykjavík, og er kostnaðarsamt, upplifa margir þátttakendur frá landsbyggðinni tímafrek og dýr ferðalög sem hindrun til þátttöku.
Þetta getur einnig gert það að verkum að þau sæki síður um styrki þar sem þau telja þá ekki eiga við um sig, eða telja möguleika sína á að komast í verkefni takmarkaðri en íbúa höfuðborgarsvæðisins. Markmið Landskrifstofu er að koma á framfæri auknum ferðastyrkjum og huga sérstaklega að landsbyggðinni í kynningarmálum.
Inngilding skal ávallt vera rauður þráður sem Landskrifstofa Erasmus+ vinnur eftir. Stefna Landskrifstofu er sú að eftir fimm ár muni sjást mælanleg aukning á inngildingu með fjölbreyttari hópi þátttakenda og í fjölda inngildingarverkefna. Landskrifstofa stefnir að því að auka vitund styrkþega um mikilvægi inngildingar og fjölbreytileika í þeirra starfi og benda á styrkjamöguleika til að auðvelda þátttöku í Erasmus+ og European Solidarity Corps.
Aðgerðaráætlun skal uppfærð af inngildingarteyminu árlega. Stefnan skal endurskoðuð á tveggja ára fresti og uppfærð eftir þörfum. Inngildingarteymi samanstendur af inngildingarfulltrúa og inngildingarteymi. Æskilegt er að inngildingarteymi sé skipað starfsfólki úr ólíkum hlutum landskrifstofunnar.
Markmið inngildingarstefnu Landskrifstofu Erasmus+ er að hafa góð áhrif á almennt starf stofnunarinnar (Rannís), enda eigi starfsmannastefna og jafnréttisstefna Rannís að taka mið af inngildingu. Hvetja skal til reglulegrar og skilvirkrar fræðslu á sviði inngildingar, með viðeigandi fræðsluaðilum. Slík fræðsla skal ná til alls starfsfólks stofnunarinnar.
Kynningarefni og textar séu inngildandi, til dæmis að auglýsa tækifæri „fyrir öll“ en ekki „alla“. Allt efni uppfylli skilyrði um aðgengi á vefsíðum stofnunarinnar og miði við tæknilausnir hvers tíma. Efni sé uppfært eftir því sem við á og taki mið af breytingum á stafrænu umhverfi vefsíða Rannís og Landskrifstofu. Valið efni sé sett á vefinn á auðskildu máli.
Margt fólk veit ekki af tækifærum sem felast í Erasmus+ og ESC. Landskrifstofa ætti að vera meðvituð um það í hvívetna. Landskrifstofa skal kynna tækifærin fyrir verkefnisstjórum annars vegar og þátttakendum hins vegar. Ekki má telja það víst að fólk sem mætir hindrunum í samfélaginu taki þátt í almennum kynningum um Erasmus+ og því þarf Landskrifstofa að leitast við að ná til þess með öðrum leiðum eins og við á. Á hverju ári tímabilsins verður lögð áhersla á að ná til einhvers af áhersluhópum landskrifstofunnar, með því að lyfta sérstaklega verkefnum sem snerta þann hóp og með virku samtali við samtök sem starfa með þeim hóp. Huga ber einnig að kynningum fyrir samfélagið í víðara samhengi.
Vekja skal athygli samfélagsins á ávinningnum sem felst í inngildingarverkefnum og ýta þannig undir að fleiri slík verkefni verði sett á fót.
Í samskiptum skal starfsfólk hafa í huga hvernig það ávarpar viðmælendur, með tilliti til kyns og tungumála. Starfsfólk svari á því tungumáli sem viðmælandi notar nema um annað sé beðið. Ekki skal gera ráð fyrir kyni fólks eða tungumálakunnáttu út frá nöfnum þess. Starfsfólk er hvatt til þess að skrá persónufornöfn er það kýs að nota sjálft í undirskrift tölvupósts.
Dæmi:
Jóna Jónsdóttir (hún/she)
Sérfræðingur │Senior Adviser
Á þennan hátt vita þau sem fá tölvupóst frá Jónu að hún vill vera ávörpuð í kvenkyni. Jafnvel þótt Jóna sé ekki kynsegin sjálf, sýnir þetta að hún gerir ekki ráð fyrir kyni fólks eingöngu út frá nöfnum þess og viðurkennir í leiðinni rétt fólks til sjálfsskilgreiningar.
Sjá Viðauka IV í pdf útgáfu stefnunnar fyrir nánari upplýsingar.
Hvetja skal til samtals um aðgengismál á skrifstofum stofnunarinnar með reglubundnum hætti, t.d. hvað varðar aðgengi milli hæða, að eldhúsi og salernum. Einnig skal huga að hlutlausri merkingu á salernisaðstöðu. Tryggja skal aðgengi á viðburðum Landskrifstofunnar og notast við gátlista (sjá Viðauka II í pdf útfáfu).
Landskrifstofa skal styðja verkefnisstjóra við að koma upplýsingum áfram til markhópa. Landskrifstofa heldur námskeið og vinnustofur til að auka þekkingu og skilning verkefnisstjóra á inngildingu. Verkefnisstjórum sé gert það ljóst að til þess að verkefni séu talin inngildandi þurfi að sýna fram á inngildingu og virkni þátttakenda í verkefni, sem og í hönnun og framkvæmd verkefnisins (sjá Viðauka III í pdf útfáfu).Verkefnisstjórar skulu minntir á að inngilding skuli höfð að leiðarljósi í öllum verkefnum.
Landskrifstofa skuli stuðla að aukinni fræðslu fyrir matsfólk umsókna, til að auka skilning á hvað felst raunverulega í inngildingarverkefnum. Verkefnisstjórar ættu að fá hvatningu og leiðbeiningar til að tryggja aðgengi í verkefnum og viðburðum sem styrkt eru af áætluninni.
Markmið: Starfsfólk Landskrifstofu sé leiðandi í inngildandi hugarfari, taki þátt í námskeiðum og eigi virkt samtal sín á milli um inngildingu. Aðgengi Landskrifstofunnar verði tryggt.
Aðgerð | Mælikvarði | Ábyrgðaraðili |
| 1. Landskrifstofa nýtir sér kunnáttu og sérþekkingu sérfræðinga til þess skipuleggja námskeið eða fræðslu fyrir starfsfólk. | 2 sinnum á ári | Inngildingarfulltrúi, forstöðukona Landskrifstofu og mannauðsstjóri Rannís |
| 2. Starfsfólk er hvatt til að nýta tækifæri til endurmenntunar um inngildingu, t.d. með lestri fræðigreina eða þátttöku í námskeiðum á vinnutíma í samráði við nánasta yfirmann. | Að starfsfólk eflist í þekkingu um inngildingu | Sviðsstjóri, mannauðsstjóri Rannís |
| 3. Inngildingarteymi hittist og tekur stöðuna á inngildingu á Landskrifstofunni, ræðir áskoranir styrkþega í verkefnum og umsóknum og möguleg kynningarmál. | Vikulega á sófaspjalli | Inngildingarfulltrúi, inngildingarteymi |
| 4. Inngilding er aðalefni á töflufundi alls starfsfólks Landskrifstofu | Tvisvar sinnum á ári | Inngildingarfulltrúi, forstöðukona |
| 5. Landskrifstofa fær ráðgjöf um aðgengi á skrifstofu frá utanaðkomandi aðilum sem starfa í málaflokknum | Var gert 2021 | Inngildingarfulltrúi, forstöðukona |
| 6. Landskrifstofa fær að setja spurningar í þjónustukönnun Rannís a. aðgengi að starfsfólki b. aðgengi að áætlununum/ c. aðgengi að viðburðum | Könnun hluti af þjónustukönnun Rannís. | Mannauðsstjóri, inngildingarfulltrúi |
| 7. Gátlisti um aðgengi á viðburður þýddur og staðfærður | Tilbúinn haust 2023 | Inngildingarfulltrúi |
| 8. Gátlisti um aðgengi kynntur á töflufundi ásamt gátlista um græn skref | Árlega í byrjun árs og eftir sumarfrí | Inngildingarfulltrúi |
Markmið: Styrkþegar verði meðvitaðir um inngildingartækifæri í áætluninni og auki vægi inngildingar í verkefnum sínum. Landskrifstofa veiti fræðslu og námskeið til styrkþega/umsækjenda.
Aðgerð | Mælikvarði | Ábyrgðaraðili |
| 1. Starfsfólk Landskrifstofu nýti talpunkta (sjá Kafla 3, aðgerð 4) til að ræða við styrkþega/umsækjendur um inngildingu, mikilvægi hennar í áætluninni og hvernig er hægt að framkvæma í ólíkum verkefnum. |
|
|
| 2. Könnun (sjálfsmat) starfsfólks á færni sinni í að tala um inngildingu í verkefnum til að meta þörf á fræðslu |
|
|
| 3. Inngilding er fastur liður í dagskrá allra upphafsfunda (kick-off) |
|
|
| 4. Gerð á stuttu myndbandi um inngildingu í verkefnum fyrir styrkþega til að sýna fyrir kick-off fundi / eða á þeim (hugvekja sem styður við kynningar Landskrifstofunnar) |
|
|
| 5. Starfsfólkið skrái inngildingarverkefni eða dæmi um inngildingu sem koma upp í samtölum við styrkþega og við yfirferð lokaskýrslna á þar til gert form á Teams |
|
|
| a. Kynningarteymi nýtir upplýsingar í forminu í kynningarstarf |
|
|
| 6. Landskrifstofa býður upp á fræðslu/námskeið sem sérstaklega fjallar um inngildingu og að kveikja inngildandi hugarfar. Vinnustofa er annað hvort á formi kynningar fyrir nýliða um inngilding í áætluninni eða sem vinnustofa fyrir verkefni sem nú þegar eru í gangi |
|
|
| 7. Útbúa myndbönd um inngildingu til að fræða verkefnastjóra (ítarlegra, hvað er inngilding og hvað ekki, í Erasmus+) |
|
|
| 8. Landskrifstofa bendir á inngildingarviðburði (t.d. námskeið eða tengslaráðstefnur) eftir því sem við á. |
|
|
| 9. Landskrifstofa sér til þess að matsfólk fái upprifjun um inngildingu í Erasmus+ í hverri þjálfun. |
|
|
| 10. Starfsfólk Landskrifstofu sem sér um þjálfunina hverju sinni fær stuðning frá inngildingarfulltrúa |
|
|
| 11. Landskrifstofa gerir myndband um birtingarmyndir inngildingar í umsóknum fyrir matsfólk | Handrit tilbúið 2024 Myndband tilbúið fyrir lok mars 2025 | Inngildingarfulltrúi |
Markmið: Ná til þeirra sem síður sækja í Erasmus+. Þetta gildir um alla áhersluhópa sem standa höllum fæti, þ.e. vegna fötlunar, veikinda, hindrana í menntakerfinu, menningarmunar, félagslegra hindrana, efnahagslegra hindrana, hindrana vegna mismununar og landfræðilegra hindrana samkvæmt skilgreiningum Erasmus+.
Aðgerð | Mælikvarði | Ábyrgðaraðili |
| 1. Inngilding sé fastur hluti af öllu kynningarstarfi um áætlunina og fjallað um mikilvægi hennar. | Fjallað um inngildingu í öllum kynningum | Sá sem fer með kynningu hverju sinni, inngildingarfulltrúi |
| 2. Myndband fyrir kynningar – þegar ekki er hægt að fara á dýptina í umfjöllun um inngildingu | Stutt myndband framleitt fyrir lok árs 2026 | Inngildingarfulltrúi í samstarfi við kynningarteymi |
| 3. Leggja áherslu á inngildingu í kynningarferðum út á land | Hver landshluti heimsóttur minnst tvisvar á hverju 7 ára tímabili áætlunar | Kynningarteymi, inngildingarfulltrúi |
| 4. Inngildingarteymi útbýr glærur og talpunkta svo annað starfsfólk geti talað um inngildingu í sínum kynningum. | 1 glæra og 1 bls af talpunktum tilbúin 2022 | Inngildingarfulltrúi |
| 5. Minna á talpunkta og glærur | Á töflufundi um inngildingu einu sinni á önn | Inngildingarfulltrúi |
| 6. Áframhaldandi samstarf við alþjóðafulltrúa og aðra viðeigandi aðila innan stofnana um aðkomu þeirra hópa sem síður taka þátt, t.d. með því að stuðla að þróun viðmiða um inngildingarstyrki | Eftir því sem við á | Starfsfólk Landskrifstofu |
| 7. Á hverju ári verður athyglin sett á einn af þessum áhersluhópum með það fyrir augum að fá fleiri umsóknir úr þeim hópi inn í áætlanir Erasmus+ og European Solidarity Corps. 2022: Landsbyggðin | Aukning verkefna með fjölbreyttari áhersluhópa | Landskrifstofan öll |
| 8. Staða þess hóps sem er í brennidepli áætlunar á einstöku ári er skoðuð í byrjun þess árs. Athuga þarfir þeirra, hvar þau eru og hvernig er best að ná til þeirra. Haft samband við samtök eða stofnanir sem vinna með hópnum. | 3-4 samtök eða stofnanir og minna á Erasmus+ tækifæri fyrir þann hóp | Verkefnastjórar |
Kynningar taki mið af inngildingu og nái til fleiri áhersluhópa.
Aðgerð | Mælikvarði | |
| 1. Landskrifstofa fái aðgang eða útbúi myndefni sem endurspeglar fjölbreyttan hóp þátttakenda a. óska eftir myndefni frá styrkþegum b. óska eftir leyfi til myndatöku í verkefni | Árlega að vori | Kynningarteymi |
| 2. Kynningarteymi flokkar myndefni og upplýsir Landskrifstofu um hvað má nota | Eftir því sem við á | Kynningarteymi |
| 3. Landskrifstofa útbúi efni með sérstakri umfjöllun um inngildingu eins og t.d. auglýsingar, fréttir, myndbönd, áminningu um mikilvægi inngildingar. | Amk 1 sinni í hverju fréttabréfi | Kynningarteymi |
| 4. Hafa samband við samtök eða hagsmunaaðila áhersluhóps ársins með það fyrir augum að útbúa kynningarefni eða nálgast áhersluhópinn | 1-2 aðilar fyrir hvern áhersluhóp | Kynningarteymi, inngildingarfulltrúi |
| 5. Auglýsingar til að vekja athygli á tækifærum í Erasmus+ til að ná til áhersluhópa, samtaka sem vinna með þeim og hagaðila | 2 sinnum á ári , í byrjun árs og eftir sumarfrí | Kynningarteymi |
| 6. Texti auglýsinga og vefsíða sé kynhlutlaus | Allt efni sem búið er til hverju sinni | Kynningarteymi |
| 7. Auglýsingaefni sé samhliða útbúið á íslensku og ensku | Auglýsingar, bæklingar, myndskeið og annað sem við á | Kynningarteymi |
| 8. Úttekt á kynningarefni. Taka fyrir stikkprufu af efni og skoða á gagnrýninn en uppbyggilegan hátt til að hægt sé að gera betur | Í lok árs | Kynningarteymi, inngildingarfulltrúi |
| 9. Í allri umfjöllun um verkefni, hvort sem það er í formi myndbands, fréttar, viðtals við verkefnastjóra skal reynt að draga fram inngildingu í verkefninu | Kynningarteymi | |
| 10. Myndbönd hafi texta á íslensku og ensku, eða táknmálstúlkun þegar við á (t.d. þegar hún hefur verið tekin upp samhliða beinu streymi) | Öll myndbönd | Kynningarteymi |
| 11. Landskrifstofa skipuleggur viðburð helgaðan inngildingu til að vekja athygli á mikilvægi inngildingar í Erasmus+ | Í lok tímabils (2027) | Kynningarteymi, Inngildingarfulltrúi |
Aðgerð | Mælikvarði | Ábyrgðaraðili |
| 1. Setja inngildingarstefnuna á vef Landskrifstofu | Tilbúið í upphafi árs 2023 | Inngildingarfulltrúi |
| 2. Veita öðrum stofnunum stuðning við gerð inngildingarstefnu ef þess er óskað | Eftir því sem við á | Inngildingarfulltrúi |
| 3. Samantekt á ávinningi Erasmus+ og ESC fyrir samfélagið, til þess að senda út sem frétt og hafa á heimasíðu Erasmus+ | Í upphafi árs 2024 | Kynningarteymi |
| 4. Styðja við réttindabaráttu jaðarsettra hópa, t.d. með þátttöku í viðburðum og á ráðstefnum helguðum málefnum þeirra og með því að vekja athygli á Erasmus+ og ESC verkefnum sem hafa haft inngildingu þeirra að markmiði | Eftir því sem við á | Landskrifstofa, kynningarteymi, inngildingarfulltrúi |
| 5. Taka þátt í Reykjavík Pride, vekja athygli á Erasmus+ styrkjum fyrir hinsegin samfélagið eða flytja fréttir af verkefnum sem stuðla að inngildingu fyrir LGBTQIA+ fólk | 2-3 sinnum á tímabilinu 2021-2027 | Landskrifstofa, kynningarteymi, inngildingarfulltrúi |
| 6. Fordæma eða taka afstöðu gegn atburðum sem ganga gegn gildum Erasmus+ (t.d. á Facebook) | Eftir því sem við á | Forstöðukona, inngildingarfulltrúi, kynningarteymi |
