Erasmus+ í sátt við umhverfið

Loftslagsbreytingar eru á öllum vörum og ljóst er að við þurfum að taka stór skref til að sporna við þeim saman, og það hratt. Á sama tíma er alþjóðasamstarf í örum vexti, og áætlanir eins og Erasmus+ og European Solidarity Corps leggja áherslu á að veita betri og fleiri tækifæri fyrir Evrópubúa að fara á milli landa til að efla færni sína og byggja brýr milli þjóða og menningarheima.

Það er mikilvægt að finna leiðir til að taka þátt í alþjóðasamstarf í sátt við umhverfi og loftslag, því samvinna þjóða er lykillinn að því að árangur náist í baráttunni gegn loftslags
breytingum. Þess vegna höfum við tekið saman ýmsar leiðir fyrir stofnanir, samtök og eins taklinga til að gera þátttöku sína í Erasmus+ eins vistvæna og kostur er á.

Hvað getur þátttakandi í Erasmus+ gert?

Einstaklingar sem taka þátt í Erasmus+ verkefnum hafa marga möguleika til að láta gott af sér leiða gagnvart umhverfinu. Ferðalög milli landa hafa óhjákvæmilega í för með sér losun gróðurhúsalofttegunda, ekki síst þegar eyjur eins og Ísland eiga í hlut. En það má draga úr áhrifum ferða á loftslagið með því að kynna sér vel kolefnissporið sem ólíkar ferðavenjur skilja eftir. Þarftu til dæmis að taka tvö flug til að komast á áfangastað? Kannaðu möguleika á að taka lest hluta leiðarinnar. Erasmus+ veitir bæði viðbótarstyrk fyrir vistvænan ferðamáta og sveigjanleika til að verja lengri tíma til ferðalagsins ef þörf er á.

Meðan á dvöl erlendis stendur er líka ýmislegt hægt að hafa í huga, svo sem vatns- og rafmagnsnotkun og val á gististöðum, sem eru margir hverjir farnir að leggja aukna áherslu á græna starfsemi. Nú er tækifærið til að nýta sér almenningssamgöngur og tileinka sér grænan lífsstíl. Lærðir þú nýjar og vistvænar aðferðir í námi, lífi og starfi? Taktu þær með þér heim og deildu með okkur hinum!

Hvað geta Erasmus+ verkefni gert?

Hvert einasta skref í Erasmus+ verkefnum má útfæra á grænan máta. Tökum viðburði sem verkefni standa fyrir sem dæmi. Hægt er að takmarka vistspor þeirra til muna með því að stilla pappírsnotkun í hóf sem og framleiðslu á ýmsum varningi í tengslum við verkefnið. Er hann örugglega nytsamlegur – og ef svo er – er hann vistvænn? Standi til að bjóða upp á veitingar á viðburðum hvetjum við til þess að hugað sé að vistspori matvæla, og einnota borðbúnaður er ekki til fyrirmyndar.

Alþjóðlegir fundir sem leiða saman fólk augliti til auglitis stuðla að mikilvægum tengslum og góðri samvinnu. En ef til vill má hugleiða hvort sumir þessara funda geti ekki átt sér stað með hjálp tækninnar. Umsækjendur eru hvattir til að setja sér stefnu í loftslagsmálum og ákveðin viðmið, til að mynda að hafa að minnsta kosti einn verkefnisfund á netinu. Fyrir fundi sem fela í sér ferðalög milli landa geta skipuleggjendur vakið athygli á grænum leiðum til að komast á áfangastað. Hví ekki að nýta alþjóðlegar samkomur til að vekja athygli á hlýnun jarðar? Hægt er að skipuleggja skemmtilegar samverustundir til að þjappa hópnum saman – planta trjám, plokka eða fá fræðslu um loftslagsmál.

Hvað getur Erasmus+ áætlunin gert?

Erasmus+ 2021-27 leggur mikla áherslu á loftslagsmál og vistvæna nálgun. Við mat á umsóknum er tekið sérstakt tillit til þeirra verkefnishugmynda sem takast á við hlýnun jarðar, efla vistvænan lífstíl og aðferðir og styðja fólk og stofnanir í að taka græn skref, og gildir þetta um alla verkefnaflokka.

Ein af nýjungum áætlunarinnar felur í sér að þátttakendur sem ferðast á vegum hennar geta óskað eftir því að fá viðbótarstyrk ef þeir velja græna ferðamáta í þeim tilfellum sem það er mögulegt. Einnig leyfa reglur áætlunarinnar nú að lengri tími sé tekinn í ferðalög en áður, kalli vistvænn ferðamáti á það. Með þessum hætti sýnir Erasmus+ að það að nota umhverfisvænni ferðamáta á aldrei að vera hindrun fyrir þátttöku eða gera hana kostnaðarsamari fyrir einstaklinginn.

Áhugavert efni

Grænar tillögur

Ertu með græna hugmynd fyrir framkvæmd verkefna í Erasmus+? Sendu okkur póst! erasmusplus@rannis.is








Þetta vefsvæði byggir á Eplica