Spurt og svarað um áhrif Brexit á Erasmus+og European Solidarity Corps (ESC)

Ég er nemandi við íslenskan háskóla og stefni á skiptinám eða starfsþjálfun skólaárið 2021-2022. Get ég sótt um að fara til Bretlands?

Samningurinn um útgöngu Breta felur ekki í sér áframhaldandi aðild að Erasmus+ áætluninni frá og með 2021. Hins vegar kveður hann á um áframhaldandi þátttöku þeirra í þeirri Erasmus+ áætlun sem er að ljúka (2014-2020). Þetta þýðir að ef háskólinn þinn hefur fengið úthlutað fjármagni árið 2020 og á styrki eftir getur hann fjármagnað ferðir til Bretlands skólaárið 2021-2022. Almennar upplýsingar um Erasmus+ stúdentaskipti á háskólastigi má finna á síðu Landskrifstofu en alþjóðaskrifstofa heimaskóla veitir nánari upplýsingar fyrir sína nemendur. Umsóknarfrestir stúdenta eru á tímabilinu janúar-apríl fyrir komandi skólaár en eru breytilegir milli skóla svo það er mikilvægt að þú kynnir þér vel upplýsingarnar frá alþjóðaskrifstofunni þinni. Einnig veita alþjóðaskrifstofur upplýsingar um hvaða leiðir eru í boði fyrir þig að fara til Bretlands án styrks. 

Ég er kennari eða starfsmaður við íslenskan háskóla og stefni á kennslu eða þjálfun erlendis skólaárið 2021-2022. Get ég sótt um að fara til Bretlands?

Samningurinn um útgöngu Breta felur ekki í sér áframhaldandi aðild að Erasmus+ áætluninni frá og með 2021. Hins vegar kveður hann á um áframhaldandi þátttöku þeirra í þeirri Erasmus+ áætlun sem er að ljúka (2014-2020). Þetta þýðir að ef háskólinn þinn hefur fengið úthlutað fjármagni árið 2020 og á styrki eftir getur hann fjármagnað ferðir til Bretlands skólaárið 2021-2022. Almennar upplýsingar um Erasmus+ starfsmannaskipti á háskólastigi má finna á síðu Landskrifstofu en alþjóðaskrifstofa heimaskóla veitir nánari upplýsingar fyrir sína nemendur. Umsóknarfrestir starfsfólks eru yfirleitt í maí fyrir komandi skólaár en eru breytilegir milli skóla svo það er mikilvægt að þú kynnir þér vel upplýsingarnar frá alþjóðaskrifstofunni þinni. Einnig veita alþjóðaskrifstofur upplýsingar um hvaða leiðir eru í boði fyrir þig að fara til Bretlands án styrks. 

Ég er þátttakandi í íslensku Erasmus+/ESC samstarfsverkefni sem hefur hafið göngu sína. Hvað verður um þátttöku bresku stofnunarinnar á aðild að verkefninu okkar?

Breska stofnunin getur áfram tekið fullan þátt í verkefninu eftir að Bretar hafa gengið úr sambandinu, þar sem samningurinn um útgöngu Breta kveður á um áframhaldandi þátttöku þeirra í núverandi Erasmus+/ESC áætlun (2014-2020). 

Ég ætla að sækja um í Erasmus+/ESC fyrir hönd stofnunarinnar minnar eða samtaka núna í ár. Getum við sótt um ferðir til Bretlands eða samstarf við breskar stofnanir eða samtök?

Nú liggur fyrir að Bretland (e. Programme Country) verður ekki þátttökuland í Erasmus+/ESC í þeim áætlunum sem hefja göngu sína í ár og því verður ekki hægt að hafa breskar stofnanir eða samtök í umsóknum með sama hætti og áður. Hvort Bretland verður með einhverjum hætti tengd áætlununum kemur í ljós þegar handbók fyrir umsækjendur verður birt á fyrri helmingi þessa árs og auglýst verður eftir umsóknum.  

Hvernig hefur samstarfinu milli breskra og íslenskra stofnana í Erasmus+/ESC verið háttað?

Íslendingar og Bretar hafa átt í mikilvægu og árangursríku samstarfi á sviði mennta- og æskulýðsmála í áraraðir, sem endurspeglast vel í framkvæmd Erasmus+/ESC. Bretland er eftirsóttur áfangastaður fyrir íslenska þátttakendur í Erasmus+/ESC og skipar sér í næstefsta sæti – á eftir Danmörku – yfir þau lönd sem Íslendingar hafa haldið til vegna náms, þjálfunar, kennslu eða sjálfboðastarfa frá árinu 2014. Um 140 manns fara héðan til Bretlands og um 200 breskir nemendur og kennarar koma hingað til lands á ári hverju. 

Hvar get ég nálgast frekari upplýsingar um áhrif Brexit á Erasmus+/ESC?








Þetta vefsvæði byggir á Eplica