Nám og þjálfun innan starfsmenntunar

Fyrir hverja?

Starfsmenntaskólar, stofnanir og fyrirtæki sem starfa á sviði starfsmenntunar og taka á móti nemum í starfsþjálfun geta sótt um náms- og þjálfunarstyrki fyrir nemendur sína, nýútskrifaða nemendur og starfsfólk sem starfar á sviði starfsmenntunar- og þjálfunar.

Til hvers?

Starfsmenntaskólar, stofnanir og fyrirtæki geta sótt um ferða- og uppihaldsstyrki fyrir nemendur í starfsmenntun og starfsfólk til að að taka þátt í mismunandi verkefnum í einu af þátttökulöndum Erasmus+. Nemendum í starfsmenntun og nýútskrifuðum (í eitt ár eftir útskrift) gefst kostur á fara til Evrópu í námsferðir og starfsnám/þjálfun í 2 vikur til 12 mánuði.

Starfsfólk getur sinnt kennslu eða þjálfun hjá samstarfsstofnun erlendis eða stundað starfsþjálfun, s.s. með þátttöku á fagtengdum námskeiðum eða vinnustofum, starfskynningum (job shadowing),eða skipulögðum heimsóknum til starfsmenntastofnana í tvo til 60 daga. Starfsmenntaskólar geta líka sótt um styrk fyrir gestakennslu sérfræðinga frá fyrirtækjum frá öðru landi.

Umsóknarfrestur

Lokað fyrir umsóknir. Næsti umsóknafrestur er í febrúar 2018.

Stutt lýsing

Erasmus+ veitir nemendum í starfsmenntaskólum og nemum á samningi tækifæri til að fara í náms- og þjálfunarferðir og starfsnám hjá skólum, fyrirtækjum og stofnunum í Evrópu í 2 vikur til 12 mánuði.  Námið/þjálfunin skal vera hluti af námi viðkomandi nemanda og metið sem slíkt að dvöl lokinni.

Dvöl starfsmenntanemenda er skipt í tvo flokka:

  • Nám/þjálfun í starfsmenntastofnunum og skólum
  • Nám/þjálfun í fyrirtækjum

Einnig veitir Erasmus+ starfsfólki í starfsmenntun tækifæri til að sinna gestakennslu og starfsþjálfun hjá samstarfsaðilum í Evrópu og starfsmenntaskólar geta sótt um að fá til sín sérfræðinga frá fyrirtækjum í Evrópu til að kenna hér á landi. 

Dvöl starfsfólks í starfsmenntun er skipt í tvo flokka:

  • Gestakennslu í skólum, stofnunum og fyrirtækjum í öðru landi og gestakennsla sérfræðinga frá fyrirtækjum í Evrópu
  • Starfsþjálfun, s.s. með þátttöku á vinnustofum, starfskynningum (job shadowing),eða skipulögðum heimsóknum til starfsmenntastofnana í öðrum landi.

Hvert er markmiðið?

Markmið náms- og þjálfunarferða nemenda er að auka hæfni þeirra og þekkingu á sínu fagsviði, efla sjálfstraust og tungumálakunnáttu, sem og að kynnast menningu og venjum annarra landa. 

Markmið starfsþjálfunarferða starfsfólks er að efla færni og þekkingu sem nýtist innan skóla og stofnana og skal dvölin með beinum hætti tengjast stefnumörkun stofnunarinnar sjálfrar og markmiða með þátttöku í Evrópusamstarfi ( sjá nánar Eruopean Dveelopment Plan).

Hverjir geta sótt um?

Einungis lögaðilar: starfsmenntastofnanir, skólar og fyrirtæki sem sinna starfsmenntun geta sótt um styrk úr Erasmus+. Einstaklingar geta ekki sótt um styrki úr Erasmus+.

Hver aðili getur aðeins sent inn eina umsókn á sviði náms og þjálfunar á hverjum umsóknafresti.  Ferðir fyrir nemendur og starfsfólk skóla skulu vera í sömu umsókn.

Sömuleiðis geta stofnanir sótt saman um náms- og þjálfunarstyrki fyrir marga smærri starfsmenntaskóla, stofnanir og fyrirtæki  í sama landi í svokölluðu samstarfsneti (consortium).  Umsækjandi þarf í þessu tilviki ekki að vera starfsmenntastofnun en stofnanir sem senda þátttakendur erlendis þurfa að sinna starfsmenntun.  Hver starfsmenntastofnun, skóli eða fyrirtæki á sviði starfsmenntar getur á sama tíma tekið þátt í meira en einu samstarfsneti.

Aðilar/stofnanir sem geta sótt um styrk í starfsmenntahluta Erasmus+ áætlunarinnar geta  m.a. verið:

  • Starfsmenntaskólar og aðrar skólastofnanir sem sinna starfsmenntun.
  • Starfsmenntastofnanir sem sinna ólíkum markhópum.
  • Lítil og meðalstór fyrirtæki.
  • Aðilar vinnumarkaðar, s.s. samtök aðila iðnaðar, atvinnulífs og launþega.
  • Opinberir aðilar, s.s. á sveitarstjórnarstigi.
  • Starfsgreinasambönd.
  • Stofnanir sem eru ekki reknar í ábataskyni, s.s. iðnaðarmannafélög.
  • Stofnanir sem sinna náms- og starfsráðgjöf.

Hvað er styrkt?

Veittir eru ferða- og uppihaldsstyrkir fyrir nemendur og starfsfólk. 

  • Styrkir til náms og þjálfunar samanstanda af ferðastyrk annars vegar og uppihaldsstyrk hins vegar.  Hvorutveggja eru fastar upphæðir og taka mið af fjarlægð til áfangastaðar og uppihaldskostnaði í viðkomandi landi.
  • Fatlaðir einstaklingar geta sótt um viðbótarstyrk vegna kostnaðar sem hlýst af þátttöku þeirra.
  • Umsækjendur fá sömuleiðis fasta skipulagsupphæð 350€ fyrir hvern þátttakanda til að sinna undirbúningi, utanumhaldi og eftirfylgni.

Lengd dvalar

  • Nemendur: 2 vikur – 12 mánuði, fyrir utan ferðadaga.
  • Starfsfólk: 2 dagar – 2 mánuðir (60 dagar), fyrir utan ferðadaga

Hvernig er hægt að finna samstarfsaðila?

 

Umsækjendur verða sjálfir að finna sína samstarfsaðila og eru upplýsingar um þá hluti af umsókn. Mikilvægt er að vanda vel val samstarfsaðila og kynna sér þeirra reynslu og fagsvið.

  • Tengslaráðstefnur eru skipulagðar af Landskrifstofum Erasmus+. Þessar ráðstefnur eru kynntar á heimasíðum Landskrifstofa jafnóðum og upplýsingar um þær berast.
  • EPALE, vefgátt fullorðinsfræðslu í Evrópu býður upp á leit að samstarfsaðilum (partner search). Stofnanir eða félagasamtök innan fullorðinsfræðslu geta skráð sig á EPALE og komist í samband við áhugasama aðila í öðrum Evrópulöndum. 
  • School Education Gateway er torg þar sem kennarar, skólafólk, sérfræðingar og raunar allir sem tengjast kennslu og skólaþróun á leik-, grunn- og framhaldsskólastigi koma saman. Þar er m.a. að finna verkfæri sem koma að notum við  leit að samstarfsaðilum .

 

Þátttökulönd

Lögaðilar í þátttökulöndunum 33 í Erasmus+ áætluninni geta tekið þátt.  Þetta eru Evrópusambandslöndin 28, EFTA löndin Ísland, Lichtenstein og Noregur og auk Tyrklands og Makedóníu.

Í fyrsta sinn frá upphafi menntaáætlunar ESB geta þátttökulönd sem eru ekki aðilar að Evrópusambandinu sótt um tvíhliða verkefni, s.s. Ísland og Noregur eða Ísland og Tyrkland

Vottun, VET Mobility Charter

Starfsmenntaskólar, stofnanir og fyrirtæki sem starfa á sviði starfsmenntunar geta sótt um Vottun (VET Mobility Charter).  Þær stofnanir sem fá samþykkta Vottun hafa fengið viðurkenningu er varðar hæfni stofnunar til að skipuleggja og framkvæma góð náms – og þjálfunarverkefni en gerð er krafa um mikil gæði verkefna þeirra aðila sem fá vottun.

Vottunin tryggir ekki sjálfkrafa fjármagn heldur aðgang að einfaldara umsóknarferli um styrki til náms og þjálfunar sem sótt er um á auglýstum umsóknarfresti til eins eða tveggja ára í senn.

Sjá upplýsingar og umsóknareyðublöð fyrir um Vottun og fyrir þá aðila sem fengið hafa Vottun.

Kennslumyndbönd

 Inngangur að umsóknarskrifum                             Umsóknarformið
 

Kennslumyndband 10 mín.

 

Kennslumyndband 40 mín.

 

 

 

 








Þetta vefsvæði byggir á Eplica